Nakatakdang sugdan karong semanaha sa Office of the Ombudsman ang preliminary investigation alang sa pipila ka kaso nga may kalabotan sa anomaliya sa mga flood control projects.
Sumala mismo ni Ombudsman Jesus Crispin “Boying” Remulla, gilauman nga magsugod sila sa imbestigasyon sa unom (6) ka kaso nga may kalabotan sa kontrobersyal nga mga proyekto lakip na ang mga flood control projects sa Oriental Mindoro ug ang mga “ghost projects” sa Bulacan.
Kahinumduman nga niadtong milabay nga bulan, nagsumite og rekomendasyon ang Independent Commission for Infrastructure (ICI) sa Office of the Ombudsman aron pasakaan og kasong kriminal sila kanhing Ako Bicol Party-list Rep. Zaldy Co, pila ka opisyal sa Department of Public Works and Highways (DPWH), ug mga kontratista.
Bag-o lang usab nagsumite ang Department of Justice (DOJ) sa ilang findings kabahin sa imbestigasyon sa maong mga proyekto, nga giduso na ngadto sa Ombudsman.
Tungod niini, gipasalig ni Ombudsman Remulla nga magapadayon ang preliminary investigation sa ilang buhatan.
Samtang, miangkon si Ombudsman Remulla nga dili lang kini ang mga kaso nga angay tagaan og pagtagad.
Gusto usab niya nga matubag ug masulbad ang proseso sa “restitution”, o ang pagpangayo og bayad o pagpanumbalik sa nawala nga pondo sa gobyerno.
Matod pa niya, makigkoordinar na siya sa Sandiganbayan ug sa Hudikatura aron mahibalo kung giunsa kini magamit isip stratehiya sa gobyerno.
Gidugang pa ni Ombudsman Remulla nga gusto usab niya nga mangayo og tabang sa Labing taas nga hukmanan (Supreme Court) aron makakuha og dugang kasayuran kabahin sa mga kaso ug proseso sa restitution.
