Gimando na sa pre-trial chamber sa International Criminal Court (ICC) nga pagasugdan na ang disclosure of evidence o pagpakita sa mga ebidensya sa kasong gi-atubang ni kanhi Pangulong Rodrigo Duterte. Gimando-an sa ICC pre-trial chamber ang ICC prosecutor nga muhatag ug mga obserbasyon ug motubag sa pipila ka pangutana nga adunay kalabutan sa ebidensya ug mga testigo nga plano niining ipakita batok kang Duterte.
Pagahimuon ang pagdungog sa kumpermasyon sa mga kaso batok kang Duterte sa Septyembre 23. Matod pa gisugdan na sa mga pre-trial judges sa ICC ang proseso sa pagpadayag sa mga importanteng inpormasyon. Gipasubmitar usab sa mga judges sa prosecutor ang general information sa mga testigong ipagawas nila ug kung plano sa mga nahisgutan nga mangayo ug anonymity sa bisan si kinsang potensyal nga saksi o dili.
Samtang giila usab sa mga judges nga ang posisyon ni Duterte sa mga gipasangil sa iyaha ang nakabutang sa mga ebidensyang ipakita sa prosekyusyon, gipahayag sa mga nahisgutan nga aron mahimong patas, imbitahan usab ang defense team aron muhatag ug obserbasyon ug motubag sa mga preliminary questions.
