DAVAO CITY – Nagpakitabang na sa buhatan ni Davao City Mayor Inday Sara Duterte Carpio ang mga Poultry Operators sa dakbayan human nialma nunot sa hilabihang kataas nga pag-usbaw sa regulatory fees.
Subay sa sulat nga gipadala sa Federation of Livestock and Poultry Associations, Raisers and Cooperatives (FLPARC) ngadto sa alkalde, makaapekto matud pa sa industriya ang 600% increase sa regulatory fees.
Nasayran nga nisaka ug 600% gikan sa milabay nga rate sa 2005 nga Revenue code gikan sa P0.50 ngadto sa P3.00 matag ulo ang gipatong ilawum sa Ordinance No. 0291-17.
Giingong anaa sa kapin 7,000 ka mga empleyado ang derekta matud pang maapektuhan sa poultry industry sa higayon nga ipatuman na ang maong usbaw sa regulatory fee.
Kahibaluang pipila sa mga signatories ang gilangkuban sa Ana’s Breeders Farms, Inc., San Miguel Foods, Inc., Vitarich, Bounty Agro Ventures, Inc., Davao Vless Poultry farm Davao Poultry and Egg Producers, Inc.
