DAVAO CITY – Gikalipay sa Davao City COVID-19 Task Force ang pag-ubos sa positivity rate sa Dakbayan sa milabayng semana.
Gikumpirma sa tigpamaba niini nga si Dr. Michelle Schlosser nga anaa na lamang sa 5.6 percent ang positivity rate sa Davao City as of October 25.
Ang maong porsyento usab, duol sa girekomendang threshold sa World Health Organization nga five percent, nga usa ka timaan nga manageable ang COVID-19 cases sa usa ka lugar.
Na-decongest na usab ang Southern Philippines Medical Center, ang main COVID-19 referral hospital sa Dakbayan, tungod sa padayong nagaubos nga mga kaso.
Namatikdan usab sa Task Force ang pag-ubos sa ihap sa mga makalas tungod sa nasangpit nga kagaw.
Usa sa mga gilantaw nga hinungdan niini mao ang padayong pagsaka sa ihap sa mga bakunadong indibidwal sa Dakbayan.
Bisan pa man niini, gikanayon sa opisyal nga kinahanglan gihapon ipatuman ang minimum public health standards.
Sa pikas bahin, gibutyag ni Schlosser nga bisan pa man wala nakab-ot ang 1.2 million vaccinated population target sa pagsulod sa bulan sa Nobyembre, pakusgan pa nila ang vaccination program sa Dakbayan, ilabi na sa mga hilit nga dapit ug sa mga komunidad sa Dakbayan nga taas ang vaccine hesitancy rate.
