Gikabalak-an ni Batangas Rep. Gerville Luistro ang posibleng pagmani-obra sa langyaw sa National Grid Corporation of the Philippines (NGCP) gumikan kay nagbaton kuno kini ug mga opisyal nga Chinese nationals.
Sa gipahigayong pagdungog sa House Committee on Legislative Franchises, giimbestigahan sa magbabalaod ang pagsunod sa NGCP sa probisyon sa Constitution nga gikinahanglang 60% ang gipanag-iyahan sa mga Pilipino ug Pilipino usab ang mahimong ibutang sa executive position ug magdumala sa kompanya.
Gihimong ehemplo sa magbabalaod ang mga ebidensya gikan sa mga record sa NGCP, lakip na ang General Information Sheet (GIS) kung diin ang mga Chinese ang anaa sa importanteng posisyon susama sa Chairman of the Board, lakip na usab ang partisipasyon sa NARI Group Corporation nga usa ka Chinese IT infrastructure provider sa operasyon sa NGCP.
Ang NGCP ang nagdumala sa power transmission grid sa nasud kung diin 40% ang gipanag-iyahan sa State Grid Corporation sa China, samtang ang nahibiling 60% ang gipanag-iyahan ni Henry Sy jr. ug Robert Coyuto jr., mga Pilipinong negosyante pinaagi sa Synergy Grid and Development Philippines.
Gihisgutan usab sa magbabalaod nga ang presensya sa mga langyaw sa mga nag-unang posisyon sa kompanya ang wala nahisubay sa balaod ug mamahimong makahatag ug hulga sa seguridad sa nasud.
