Nagpahimangno si Congresswoman-elect Leila de Lima sa posibleng dili pagpadayon sa impeachment trial batok ni Bise Presidente Sara Duterte, nga iyang gibutyag nga usa ka matang sa pagtamay o pagtraydor sa atong sistema sa hustisya. Sumala pa ni De Lima, angay sundon ang proseso nga gitakda sa Konstitusyon bisan pa man og adunay kabalaka nga basin magkulang sa suporta ang kaso o adunay pagpamugos gikan sa mga adunahan ug gamhanan.
Gidugang pa ni De Lima nga angay gayud nga sundon ang proseso sa Konstitusyon bisan pa og adunay kahadlok nga dili kini makakuha og igo nga suporta sa umaabot nga impeachment trial. Kahinumduman nga kaniadtong Pebrero 5, nagsumite ang 215 ka mga kongresista og usa ka hiniusang reklamo sa impeachment batok kang VP Duterte tungod sa giingong sayop nga paggamit sa confidential funds ug sa paghulga sa pipila ka opisyal sa gobyerno, lakip na sila si Pangulong Ferdinand Marcos Jr., First Lady Liza Araneta-Marcos, ug House Speaker Martin Romualdez.
Tungod milapas sa one-third requirement sa House of Representatives ang mga boto alang sa impeachment, napatik sa Konstitusyon nga kini angay gilayon nga ipailawom sa trial sa Senado. Sa pagkakaron, gimandoan na sa Senado nga gipangulohan ni Senate President Francis Escudero ang House prosecution panel nga ipresentar ang Articles of Impeachment karong Hunyo 2.
Pagbutyag pa ni De Lima nga ang pagsunod sa proseso usa ka katungdanan sa mga mambabalaod aron manubag ang mga anaa sa gahum o katungdanan.
