DAVAO CITY – Gipatawag sa Davao City Council ang Department of Environment and Natural Resources kon DENR 11 alang sa paghatag og detalye ug uban pang development sa gipasirad-ang kapihan sa usa ka langub sa Sitio Langub, Barangay Baganihan, Marilog, ning dakbayan.
Gikabutyag ni DENR 11 regional director Bagani Fidel Evasco nga kinahanglan masulbad ang political boundary sa maong langub tungod base sa ilang imbestigasyon, ilang gihingusgan nga nahimutang ang maong langub sa Davao City.
Apan sumala sa certificate of ancestral domain nga kabahin kini sa political boundary sa Region 10.
Nabutyag sab sa buhatan nga nagkuha og business permit ang tag-iya sa maong kapihan sa Arakan, North Cotabato bisan pa man anaa sa Region 11 ang maong patigayon.
Subay sa monitoring sa buhatan, wala nay susamang mga patigayon ang nag-operate dinhi sa dakbayan.
Gihingusgan karon sa Davao City Council ang pagpahigayon ug survey ang tanang mga patigayon sa Marilog area aron masuta ang legalidad sa uban pang establisyemento nga natukod sa distrito.
Kini sab aron masiguro nga wala nay laing mga patigayon sa dakbayan nga makamugna og kadaot sa kinaiyahan ingon man perwisyo sa mga komunidad nga gitukuran niini.
Kahinumduman nga niadtong Abril 30 ning tuiga, dihang gisudlan sa mga sakop sa NBI 11 ug DENR 11 ang kapihan sa langub atol sa paghatag og search warrant batok sa mga tag-iya ug managers sa maong patigayon.
via || Bombo LJF
