DAVAO CITY – Gihupay sa usa ka Political Analyst og University Professor ang kabalaka sa pipila, sa posibleng pagkaylap sa kagubot sa Ukraine og Russia.
Sa eksklusibong pakighinabi kang Political Analyst Prof. Ryan Maboloc, gikabutyag niini nga dili na modako pa ang kagubot sa Ukraine gumikan dili pa andam ang Estados Unidos nga makigbatok sa Russia, labi na nga usa kini ka Nuclear State.
Gipasabot usab ni Prof. Maboloc nga dili mapabiling Neutral ang Pilipinas sa kagubot sa ubang nasud kini gumikan sa Institutional Obligation subay sa Art. 1 sa Charter sa United Nation.
Gidugang pa niini nga kung subayon ang kasaysayan, nahimo na nga proxy war ang nasud.
Pero sa karon nga malinawon ang Asya mas maayo matod pa nga ipabilin ang Friendly Strategy.
Kahinumdomang nahimong bahin ang panglantaw sa publiko sa pamahayag ni Pangulong Rodrigo Duterte hitungod sa Mutual Defense Treaty tali sa Pilipinas og Amerika diin tugotan matod pa niini ang US nga gamiton ang pasilidad sa nasud, higayong mokaylap ang kagubot sa Ukraine.
