DAVAO CITY – Gipasaka na sa kapulisan niadtong lunes sa hapon ang kaso batok sa deputy police station commander sa Davao Occidantal kansa gikanayong nanumbag ug nagpaboto sa iyang armas alas 10:20 sabado sa gabii sa Purok 3, Km. 11, Barangay Catalunan Pequeno, Talomo.
Gikanayon ni Chief Insp. Ronald Lao, precinct commander sa Talomo police, tulo ka ihap sa kasong grave threats ug physical injury ang gipasaka batok kang Sr. Insp. Nathaniel S. Millado, 37, deputy police commander sa Malita, Davao Occidental.
Gawas niini gikanayon ni Lao nga ginapaabot pa usab nila ang resolution sa city prosecutors office kung mamahimo ba usab nilang ipasaka ang mga kasong indiscriminate firing ug alarm and scandal batok kang Millado.
Kahinumduman nga gireklamo si Millado nga nang-hasi sa grupo nila Andres Sibumpan Sialana, Peter Perez Sahot ug Eric Respondo Gapol, tanan mga residente sa Purok 3 sa Km. 11.
Subay sa report, nag-inum ang mga complainant daplin sa dalan sa dihang milabay si Millado sakay sa iyang motorsiklo alas 8:40 sa gabii.
Apan mikanaug kini sa iyang motor ug nakig-lallis kang Sialana sa wala pa matinong hinungdan.
Gumikan sa kasuko, gisumbag sumala pa sa Police si Sialana ug mibunot sa iyang armas ug nagpa-boto sa maka-usa ka higayon.
Human sa panghitabo, miadto sumalapa si Millado sa Talomo police station aron ireport ang panghitabo diin nag-abot sila sa complainant nga magpa-blotter sa gihimo kaniya sa police.
Apan, gipamugos ni Millado nga usaka matang sa self defense ang iyang gihimo gumikan kay gitabangan na siya sa grupo sa mga complainant.
Sa higayong mapamatud-ang sad-an, posibling masuspende o kaha mapalagpot sa iyang katungdanan ang nahisgutang police.
