Gitawag ni Davao City Police Office (DCPO) Director Police Col. Hansel Marantan nga PIDOPILYA si KOJC founder Pastor Apollo Quiboloy.
Gibulgar ni Marantan atol sa presscon gahapon nga sagad sa mga mabiktima ni Quiboloy ang mga menor de edad nga anaa sa 13 hangtod 15 anyos ang pangidaron sulod matud pa sa 5 katuig.
Dugang pa niini nga mitumaw ang mga biktima human nga misurender si Quiboloy niadtong Setyembre 8 ning tuiga gumikan matud pa sa kahadlok nga nasinatian lakip na sa mga bahad nga ilang nadawat.
Human matud pa nga gamiton ni Quiboloy ang mga bata, ginaingnan matud pa niini ang mga menor nga ‘pure ug intact’ gihapon ang ilang pagkababaye gumikan nakighilawas lamang sila sa espiritu sa Ginoo.
Duha matud pa ang personal nga nahinabi ni Marantan,samtang 3 ang nakahinabi niini pinagi sa video call. Gani, ang mga nahimong biktima ni Pastor Quiboloy gikan sa Childrens Joy Foundation niini nga libre niining ginapaeskwela.
Sa karon, ginakuhaan na sa kapulisan og sworn statement ang 5 matud pa ka mga biktima sa maong Pastor ug naki-alayon na sab ang DCPO sa mga hingtungdan ahensiya aron mas mapalig-on ang proteksiyon sa mga biktima samtang ginahikay ang ilang pag-atubang sa korte.
Samtang, nanawagan si Col. Maratan sa lain pang mga nabiktima ni Quiboloy nga di mahadlok ug mudangop sa otoridad aron mas mapalig-on matud pa ang kasong ipasaka batok kang Quiboloy.
Kahinumdumang gibular ni Marantan sa social media account sa DCPO ang reklamo sa 5 ka mga matud pa biktima ni Quiboloy samtang nagbakho og hinilak lakip na ang bahad kanila nga pamatyon ug balikan sa Angel of Death sa higayon nga ibulgar ang code of secrecy.
