Nagsaad ang Philippine National Police nga suportahan ang mga inisyatibo sa gobyerno batok sa sayop nga impormasyon ug fake news bahin sa kasamtangang sitwasyon sa nasud sa energy-related issues.
Sumala kang PGen. Jose Melencio Nartatez Jr., gipakusgan sa PNP ang ilang mga lakang aron mapugngan ang pagkuyanap sa makalinlang nga impormasyon taliwala sa padayon nga giyera sa Middle East nga nakaapekto sa suplay sa lana ug ekonomiya sa nasud.
Gipahimangnoan niya nga dili tugutan sa kapulisan ang paggamit sa isyu aron mapakuyanap ang kabalaka sa publiko.
Matud pa sa hepe, bisan unsang pagsulay nga ilihis ang publiko kabahin sa energy security, suplay, ug presyo sa krudo ug produktong petrolyo mahimong seryosong paglapas nga pwede masang-at sa angay nga kaso.
Gipahimangnoan usab sa PNP ang publiko nga magpabiling magmatngon ug responsable sa pagdawat sa impormasyon nga makita lamang sa internet ug social media platforms.
