Gibutang na sa heightened alert status ang tanang yunit sa Philippine National Police (PNP) karong Semana Santa aron masiguro ang kaluwasan sa publiko.
Sa command conference nga gihimo sa Camp Crame, gipanguluhan ni PNP Chief Gen. Rommel Francisco Marbil ang pagpalig-on sa police visibility ug ang pagtutok sa kahimtang sa seguridad sa katawhan.
Gimanduan ni Gen. Marbil ang mga kapulisan nga magbantay batok sa mga krimen, sama sa pagpangawat ug akyat-bahay, ilabi na nga daghang pamilya ang magbakasyon niining panahona. Kauban niini, iyahang gimando ang hugot nga pagpatuman sa gun ban ug mas istriktong koordinasyon sa mga barangay officials, tanod, ug mga private security personnel sa mga subdivision ug establisemento aron mapugngan ang mga hulga sa seguridad.
Gisiguro sa PNP ang ilahang dedikasyon nga mapadayon ang malinawon ug hapsay nga pagsaulog sa Mahal nga Adlaw.
