DAVAO CITY – Gipasalig sa Philippine National Police (PNP) nga hatagan gilayon nila og aksiyon ang pipila ka mga estasyon sa kapulisan sa Davao del Sur nga dili na mamahimong magamit o ipailalom sa pagkumpuni gumikan sa nahitabong Magnitude 6.9 nga linog sa milabay nga dominggo.
Sumala pa kang Police Major Jason Baria, tigpamaba sa Police Regional Office (PRO) 11, kinahanglan nga makumpuni gilayon ang mga buhatan sa kapulisan sa Hagonoy, Sta. Cruz ug Sulop ug kampo sa Davao del Sur mobile force company ingon man mobile force sa Digos City ug lain pang gambalay sa provincial head quarters.
Nasayran sab kang Baria nga anaa sab karon sa tulo ka mga estasyon sa kapulisan ang totally damage nga gilangkuban sa Kiblawan, Magsaysay ug Padada sa nahisgutan nga lalawigan.
Gipahibalo sab sa opisyal nga ila ng napadala sa kaulohan ang ilang request ug nanghinaut nga masugdan gilayon ang pagkumpuni niini sa hinanali nga panahon.
