Gipatin-aw sa Philippine National Police o PNP ngadto sa 25 ang ilang ihap sa mga namatay tungod sa hiniusang epekto sa Habagat ug mga bagyong miigo sa nasud, gikan sa unang 26 human sa validation.
Gikumpirma ni PNP Public Information Chief Col. Allen Rae Co nga lakip sa mga namatay ang usa ka personnel sa kapulisan.
Base sa pinakabag-ong datos nga gipasa sa mga Police Regional Offices o PROs ngadto sa PNP National Headquarters kagahapon sa buntag, Agosto 13, mao kini ang pagkabahin sa mga namatay:
PRO Cordillera Administrative Region o CAR:
La Trinidad, Benguet – 2 tungod sa pagguho sa yuta;
Baguio City – 10;
Atok, Benguet – 3.
PRO Calabarzon:
Rodriguez, Rizal – 2 tungod sa pagguho sa yuta;
Batangas City – 3 tungod sa pagkalumos, pagkakuryente ug pagguho sa yuta;
Antipolo City, Rizal – 1 tungod sa pagkahulugan og kahoy;
Binangonan, Rizal – 1 tungod sa pagkalumos.
PRO Ilocos Region:La Union – 1 tungod sa pagkakuryente;
Alaminos, Pangasinan – 1 tungod sa pagkalumos.
PRO Negros Island Region:
Cadiz City, Negros Occidental – 1, usa ka PNP personnel nga namatay tungod sa pagkalumos.
Gipasabot usab ni Col. Co nga mas taas ang datos sa PNP kumpara sa pinakabag-ong ihap sa National Disaster Risk Reduction and Management Council o NDRRMC nga anaa sa 21 ang mga namatay.
Dugang pa niya, gikan mismo sa mga yunit sa PNP nga gipahimutang sa mga nahisgutan nga lugar ang datos nga nadawat sa nasudnong hedkuwarter sa kapulisan.
Matud kang Col. Co, posible nga magkalahi ang ihap sa mga namatay taliwala sa nagkadaiyang ahensiya tungod sa ilang kaugalingong sukdanan sa pagtino sa mga kaso, ilabina sa pag-establisar kung direktang may kalabotan ba sa Habagat o sa mga bagyo ang hinungdan sa pagkamatay.
Gireport usab sa PNP nga mokabat sa 82 ka personnel niini ang naapektuhan sa pagbaha sa Metro Manila ug Mimaropa.Lakip sa epekto sa padayong pag-ulan ang pagkadaot sa mga panimalay sa pipila ka personnel tungod sa pila ka adlaw nga kusog nga ulan nga dala sa Habagat. Sa pagkakaron, padayon ang pagmonitor sa PNP sa kahimtang sa ilang mga personnel nga naapektuhan sa kalamidad.
