Gi-awhag sa Philippine National Police (PNP) ang tanang tulunghaan nga makigkoordinar una sa kapulisan sa dili pa magpahigayon og mga off-campus activities aron masiguro ang kaluwasan sa mga estudyante. Sumala pa kang PNP Chief Police General Jose Melencio Nartatez Jr., pinaagi niini mahimong magpahigayon ang security assessment, emergency response planning, traffic management, ug koordinasyon sa rescue ug medical services sa dili pa magsugod ang kalihokan.
Kahinumduman, gisundan kini sa pagkalumos sa duha ka student-athletes sa Ateneo de Manila University atol sa usa ka team-building activity sa Aurora. Dugang pa niini, gimandoan na usab sa PNP ang tanang regional offices ug local police stations nga palig-onon ang koordinasyon sa Department of Education (DepEd) ug Commission on Higher Education (CHED) aron mapalambo ang mga lakang sa kaluwasan sa mga eskwelahan.
Sa kasamtangan, giawhag usab sa PNP ang mga eskwelahan nga palig-onon ang mental health ug psychosocial support programs alang sa mga estudyante, human sa sunod-sunod nga mga insidente sa pagpangluba ug uban pang mga kaso sa kapintasan nga nalambigit sa mga kabatan-onan.
