Gisugdan na karong adlawa ni Philippine National Police (PNP) Chief PGen. Nicolas Torre III ang iyang boxing training isip tubag sa hagit ni Davao City Acting Mayor Sebastian ‘Baste’ Duterte.
Matod ni Torre, seryoso niyang gidawat ang maong hagit tungod kay posible kini mahimong usa ka fund raising event aron matabangan ang mga residente nga naapektuhan sa pagbaha ug kusog nga ulan niadtong mga nakalabay nga semana.
Bisan pa man adunay pipila nga nagtanyag og tabang aron makapangita og venue, gikumpirma sa hepe nga nakaplastar na sa Rizal Coliseum ang pagahimoong boxing match batok kang Baste karong umaabot nga Domingo.
Sa pagkakaron, wala pa’y pormal nga tubag si Acting Mayor Baste kung mudayon ba siya sa maong sangka batok ni Torre, apan bisan pa man niini, misiguro ang hepe nga bisan dili motunga ang mayor, adunay mga unang nagpahayag og suporta ug donasyon alang sa mga kabus nga grabe nga naapektuhan sa bagyo ug habagat.
Samtang, nalipay usab ang hepe sa interes sa publiko mahitungod sa posibleng boxing match nila sa mayor.
Matod niya, dili kini pagpatol apan usa ka oportunidad aron makatigom og igo nga pondo nga magamit sa pagtabang sa mga biktima sa kalamidad.
