DAVAO CITY- Nagpatuman karon og pagsaka sa presyo sa pletehan ang mga Ferry boat nga gabyahe tali Island Garden City of Samal ug Davao City.
Base sa gipagawas nga anunsyo sa Maritime Industry Authority Davao Region (MARINA-Davao), muabot na sa P100 ang pamasahe sa mga motorsiklo nga musakay sa ferry.
Dako ang pagsaka sa presyo niini nga kaniadto anaa lamang sa P70. Sa pikas bahin, ang tricycle anaa na sa P200 nga kaniadto P180 ug ang mga pasaherong mag walk-in ang kinahanglang mubayad og P15 nga pamasahe gikan sa P10.
Ang maong kausaban ang ipatuman sunod semana, adlaw nga Martes, Nobyembre 15, 2022. Gikanayon sa Supervising Maritime Development Specialist sa Marina nga si Atty. Genevieve Calsada, mihangyo matud pa kanila ang MAEWESS Ferry Boat niadtong Oktobre 2022 nga patas-an ang pletehan sa ferry.
Gilayon sab kining naaprubahan human nga walay mibabag sa maong hangyo. Nasayran sab nga usa sa mga rason niini mao ang nagkataas nga presyo sa mga materyales, gasolina ug maintenance sa lantsa.
