Dili kuno maapektuhan ang kaso ni Kingdom of Jesus Christ (KOJC) leader Apollo Quiboloy nga napasaka na sa korte gumikan sa kasabutan nga namugna sa prosecutors sa Estados Unidos ug sa kanhi administrador niini sa KOJC.
Si Marissa Duenas, human resources manager sa KOJC ang misugot sa plea bargain deal sa US prosecutors kung diin bugti sa iyahang guilty plea, ibasura sa US ang tanang kaso niini sa human trafficking, money laundering ug forced labor.
Giklaro ni Department of Justice (DOJ) Spokesperson Mico Clavano nga ang mga kaso batok kang Duenas ang nahisakop sa plea bargain ug magpabilin ang pagdungog sa kaso batok sa ubang akusado lakip na si Quiboloy.
Si Quiboloy ang kasamtangang anaa sa kustodiya sa Philippine National Police homan nagpagawas ug arrest order ang Quezon City Regional Trial Court ug Pasig RTC sa kasong qualified human trafficking, sexual ug child abuse.
Dugang gipahayag sa opisyal nga pabor pa kini sa DOJ ang plea deal ni Duenas gumikan kay mamahimo kining magamit sa prosecution batok kang Quiboloy.
Si Duenas ang nahilakip sa mga naaresto sa mga ahente sa Federal Bureau of Investigation (FBI) homan gipatuman ang raid sa Van Nuy, Los Angeles, California kaniadtong February 2020.
