DAVAO CITY – Arestado sa mga otoridad ang pito ka mga tawo lakip na ang duha ka sundalo ug government employee sulod sa usa ka drug den sa Purok 13, Barangay San Miguel, Tagum City, Davao del Norte, atol sa gipahigayong buy bust operation niadtong nakalabayng adlaw.
Giila sa PDEA XI ang mga dinakpang sila Armando Parallaga alyas “Manding”, 56 anyos, usa ka delivery van driver; mga myembro sa kasundaluhan nga sila PFC Butch Ysmael Tabuzares ug PFC Rigor Ramales; Davao del Norte LGU employee nga si William De Vera, ug lain pa nilang mga kaubanan nga sila Yul Clin Misoles, Jodee Porlares ug si Mike Guadelquiver.
Positibong napalitan ang usa sa mga suspek og usa ka gramong pakete sa gituohang shabu nga nagkantidad og P9,000.
Samtang sakpan sab ang mga dinakpan sulod sa drug den nga nag-shabu session hupot ang laing 46 gramos sa gidudahang shabu nga nagkantidad og anaa sa kapin P312,000, usa ka .45 kalibre nga pistola, usa ka 12 gauge shot gun, usa ka 9mm Uzi Sub-machine gun, lima ka mga bala lakip na ang marked money.
Gikustodiya na ang mga dinakpan sa PDEA XI samtang mag-atubang sila og kasong paglapas sa Republic Act 9165 kon Comprehensive Dangerous Drugs Act of 2002.
via || Bombo LJF
