DAVAO CITY – Pormal nang nitahan sa gobyerno ang pito ka miyembro sa New People’s Army ngadto sa 56th Infantry Battalion sa Philippine Army sa Sityo Central Baugan, Barangay Palma Gil, Talaingod, Davao del Norte ning nilabayng adlaw.
Giila sa 10th Infantry Division sa report niini ang mga ni-surrender pinaagi lamang sa ilang mga alyas nga sila Fernando Poe, Rustom, Sarmontano, Adolfo, Agata, Rica, ug alyas Andrew E. Pulos sila mga kanhi sakop sa Sub-Regional Sentro De Grabidad PEDDLER, Sub-Regional Committee 2 sa North Central Mindanao Regional Committee (NCMRC) sa NPA, nga naglihok sa utlanan sa Bukidnon ug Talaingod, Davao del Norte.
Nahimong posible ang pagtahan sa mga kanhi rebelde tungod sa hiniusang paningkamot sa 56IB ug 1003rd Infantry (Raptor) Brigade.
Gipasalamatan ni Brigadier General Allan Hambala, ang acting Commander sa 10ID ang pagtahan sa mga komunista sa NPA ug ang hingpit nga pagbalik sa sabakan sa balaod.
Anaa sa kustodiya sa 56IB ang mga rebelde nga ipasailawom sa custodial debriefing ug medical intervention samtang gina-endorso sila aron makahigayon sa Enhanced Comprehensive Local Integration Program (E-CLIP) sa gobyerno.
via || Bombo LJF
