DAVAO CITY – Gibana-bana nga mokabat ngadto sa P1.3 ka milyon ka pesos ang namugnang danyos labot sa mga naugdaw nga mga kabtangan human ang sunog kaganinang ala 1:45 sa kaadlawon sa Toril, ning dakbayan.
Nasayran nga nasunog ang pito ka mga balay sa Dalliao Toril, ning dakbayan sa Davao, diin usa ka tigulang ang patay sa panghitabo human nga wala na makagula sa iyang kwarto.
Nasayran nga nagsugod ang pag-ulbo sa kalayo sa gipoy-an sa biktima nga usa ka Anastacio Monteclaros, 83 anyos, sa Sitio San Roque, Dalliao, Toril.
Sumala sa apo nga usa ka Bernabe dili na makalakaw ang iyang apohan, ug posibli nga duna kini’y napasagdan nga dinagkotan nga candela.
Alas 1:45 kaganinang kaadlawon miulbo ang sunog ug napalong lamang ang kalayo mga alas 2:10 na sa kaadlawon. Gumikan sa kakusog sa hangin nalisdan ang kabomberohan sa pagpalong sa kalayo.
Paspas kayo nga mikanit ang kalayo sa kasikbit nga unom ka mga kabalay sulod sa nahisgutan nga compound.
