DAVAO CITY – Naugdaw sa nahitabong sunog ang pito ka mga panimalay kagahapon pasado alas-9:33 sa buntag sa Purok 4-A, Brgy. 23-C, ning dakbayan sa Davao.
Subay sa report sa BFP Davao City Fire District nga nagsugod ang sunog sa panimalay ni Sammy Abdulsalam ug mikuyanap kini sa mga kasilinganan.
Paspas sab nga mikuyanap ang kalayo sa kasikbit nga mga panimalay gumikan kay gama lamang kini sa light materials nga miabot pa sa ikaduhang alarma.
Hinuon, paspas sab ang pagpalong sa maong kalayo gumikan sa firewall duol sa lugar.
Gikanayon sa BFP nga walay nakabsan sa kinabuhi, apan dunay naangol tungod sa maong panghitabo.
Nadeklara nga fire-out pasado alas 11:00 ang takna sa udto.
Gibana-banaan nga mokabat sa P105,000 ang damyos sa sunog nga nakaapekto sa walo ka mga pamilya.
Sumala pa sa mga kabomberohan nga linya sa kuryente sulod sa panimalay ang hinungdan sa sunog.
Gipailawom na sa validation sa City Social Welfare and Development Office (CSWDO) ang mga pamilya nga naapektuhan sa sunog.
Kini na ang ika-11 nga sunog nga nahitabo karong bulan sa Nobyembre.
Kahinumduman nga gikabutyag sab ni SFO4 Gillado dinhi sa Bombo Radyo Davao nga misaka ang ihap sa mga sunog karong tuiga diin miabot kini sa 530 gikan Enero hangtod Oktubre.
Sa maong ihap, 261 ang structural fires kon sunog nga sagad mahitabo sa mga kabalayan ug gambalay.
Samtang anaa sa 269 ang ihap sa mga non-structural fires o katong pag-ulbo sa kalayo sa natural nga mga rason sama sa wildfires.
via || Bombo DF & Bombo LJF
