Pipila sa mga local candidates nakaduso na sa ilang COC sa Comelec

DAVAO CITY – Hapsay sa kinatibuk-an ang unang adlaw sa filing of Certificate of Candidacy sa opisina sa Commission on Elections Davao kagahapon.

Mingaw ang buhatan sa COMELEC Davao sa Magsaysay Park sanglit walay midayo nga daghanang supporters sa mga politiko, ug tulo lang usab ka mga kandidato ang nag-file og COC.

Buena mano kagahapon si incumbent Davao City 3^rd District Councilor Wilfredo Al-ag nga mudagan alang sa iyang ikaduhang termino isip Konsehal.

Misunod kaniya ang kanhi 1^st District Councilor Nilo Abellera, Jr., nga buot mubalik sa Konseho sunod tuig.

Samtang, nagduso usab og COC ang kanhi piloto ug anak sa incumbent 2^nd District Councilor Danilo Dayanghirang nga si Danilo II.

Gibutyag usab sa batang Dayanghirang nga mag-fili og COC ang iyang amahan sunod semana alang mupapili isip 2^nd District Representative. Wala pa usab miadto sa COMELEC Davao si Incumbent Mayor Sara Duterte ug ang igsuon niini nga si Incumbent Vice Mayor Sebastian Duterte.

Una nang namahayag si Mayor Sara Duterte nga mupapili kini alang sa ikatulong sagunsong termino niini sa susamang katungdanan, bisan pa man nga nagakusog gihapon ang mga pag-awhag kaniya nga mudagan isip Presidente sunod tuig.