Nagsugod na sa paghiabot ang mga pinoy athletes sa Athletes Village pipila ka adlaw una magsugod ang 2024 Paris Olympics karong Hulyo 26 sa France.
Nag-iyahay ug post sa social media ang pipila ka miyembro sa Team Philippines nga naka-check in na sa Athletes Village.
Nag-una sa listahan si world champion Carlos Edriel Yulo nga usa sa mga adunay dakong kahigayunan nga makakuha ug bulawang medalya sa Paris Games.
Gawas kang Yulo, nahiabot na usab sa Athletes Village ang kauban niini sa Gymnastics team nga sila si Aleah Finnegan, Levi Ruivivar ug Emma Malubuyo.
Nagpagawas pa ug vlog si Ruivivar kung diin kauban niini ang iyang roomate nga si Finnegan sa pag-tour sa ilahang kwarto sa Athletes Village.
Gipamatud-an usab ni Ruivivar nga lig-on ang mga higdaanan sa Athletes Village kung ikumpara sa mga batikos nga posibleng mahugno ang mga kama nga gigama sa solidong karton.
Gi-ambak-ambakan pa ni Ruivivar ang kama niini aron pamatud-an nga lig-on kini.
Nahiabot na usab sa Athletes Village si Joanie Delgaco nga makita sa aksyon sa rowing competition sa unang adlaw sa bakbakan karong Hulyo 27.
Gipakita usab ni Delgaco ang mga freebies nga gipanghatag sa mga atletang misalmot sa Paris Games.
Nahilakip usab sa mga gipanghatag ang brandnew Samsung flip nga adunay logo sa Paris Olympics.
