DAVAO CITY – Magpahigayon sumala pa karon ang pipila ka mga pampublikong tulonghaan sa Davao region ug face to face enrollment sa mga buot magpadayon sa ilang pagtungha.
Kahinumduman nga usa kini sa mga gimando sa Department of Education (DepEd) apan hugtanon nga ipatuman ang pipila ka mga sumbanan ug health protocols.
Una niini, nagpasalamat ang ahensiya pinaagi sa ilang tigpamaba nga si Jenielito Dodong Atillo, gumikan kay nahimong positibo ang tubag sa mga ginikanan nga ipadayon pa gihapon ang pagtungha sa ilang mga anak.
Bisan nga imposible nga maangkon sa DepEd ang usa ka milyon nga target sa mga enrollees karong tuiga, naglaom sila nga makaabot kini sa 500,000 ayha magsugod ang klase sa bulan sa Agosto.
Sa kasamtangan, padayon sumala pa nga nagasaka ang ihap sa mga nagapa-enroll nga usa ka maayong timailhan nga daghanan pa gihapon ang interesado nga magpadayon sa pagtuon luyo sa nasinatian nga Covid-19 pandemic.
Sama sa gibutyag sa DepEd, mamahimong makapili ang mga ginikanan kung unsa nga modalities ang ilang pili-on apan mas daghanan sumala pa ang mipili karon sa modular sanglit dili tanan ang makapalit ug gadget ilabi na kadtong nanimuyo sa mga hilit nga dapit.
