DAVAO CITY – Nakasinati ang kadaghanan sa mga residente sa Brgy. Tulalian, Santo Tomas, Davao del norte ug LBM, pagpanakit sa tiyan ug pagsuka-suka nga mao ang timailhan sa diarrhea kagahapong adlawa, adlaw nga biyernes.
Gumikan sa nahisgutang panghitabo, gidala gilayon ni Atty. Elisa Evangelista-Lapiña, Municipal Administrator sa nahisgutang lungsod subay na usab sa kamando-an ni Mayor Ernesto Evangelista ang mga personahe sa Municipal health office aron makahatag ug hinabang sa mga apektadong komunidad.
Mipahigayon na usab sa pag-imbestiga ang Municipal health office sanitation team aron masayran ang nahimong hinungdan sa problema.
Nagpadala na usab ang lokal nga kagamhanan ug plastic beds, mga pagkaon ug uban pang medical support sa mga pasyente nga kasamtangang gipahimutang sa Barangay covered court.
