DAVAO – Ubay-ubay ka mga residente sa Mintal ning dakbayan sa Davao ang mihikling pasado alas sais kagabie human nga nakasinate ug pagbaha ang ilang lugar hatud sa kusog nga pagbundak sa ulan.
Sumala sa City Disaster Risk Reduction and Management Office (CDRRMO), anaa sa yellow code Talomo River ug Lipadas River. Anaa sa upat ka mga pamilya o 22 ka mga indibidwal ang mihikling sa ilang panimalay sa Purok 15 sa Mintal paingon sa Mintal Gymnasium.
Mikabat sab sa unom ka mga pamilya o 18 ka mga indibidwal ang mibakwit gikan sa ilang panimalay sa Purok 23, Sto. Niño sa Mintal human nga milapaw ang creek sa area nga miresulta sa pagbaha.
Temporaryo nga gipahimutang ang mga nahisgutan sa Sto. Niño Gymnasium. Samtang anaa sab sa upat ka mga pamilya o 22 ka mga indibidwal ang mihikling sa Purok 15, Mintal gumikan pa gihapon sa pagbaha ug temporaryo nga nagtenir ang mga nahisgutan sa Mintal Gymnasium.
Nanawagan na lamang si Alfredo Baloran, hepe sa City Disaster Risk Reduction and Management Office (CDRRMO) ngadto nga kanunay mag-igmat ilabi na kadtong nanimuyo sa lugar nga delikado sa pagbaha ug pagdahili sa yuta.
