DAVAO CITY – Mibalik na karon ang pipila ka mga residente sa Davao region nga una ng gipahikling ayha pa man misulod sa milabay’ng adlaw ang Bagyong Odette.
Kahinumduman nga adunay mga lugar sa Davao region partikular na sa Davao del Oro, Davao Oriental ingon man dinhi sa dakbayan sa Davao ang kalakip sa mga naapektohan sa daut nga kahimtang sa panahon hinungdan nga gipahikling na daan ang mga nahisgutan aron masiguro ang ilang kaluwasan ug dili mabutang sa alanganin ang ilang sitwasyon.
Una ng nasayran sa City Disaster Risk Reduction and Management Office (CDRRMO), anaa sa 13 ka mga indibidwal ang gipabakwit sa Barangay Matina Crossing human nga duruha ka mga pinuy-anan ang totally damage tungod sa nasinatian nga landslide.
Mikabat sab sa 614 ang mihikling sa lungsod sa Davao de Oro human nga pipila sa mga pinuy-anan ang nakasinate ug mga pagbaha.
Natala sab ang 477 ka mga indibidwal nga apektado sa Barangay Andap sa lungsod sa New Bataan samtang 137 ang gikan sa Barangay Magsaysay sa lungsod sa Nabunturan.
Samtang ang mga cottages sa lungsod sa Caraga Davao Oriental ang gibanlas sa mga dagkong balod ug kusog nga hangin.
Ang uban pa nga mga areas sa rehiyon ang nakasinate ug hinay ngadto na sa kasarangan nga pag-ulan apan wala sumala pay dagkong mga insidente nga nahitabo sa nahisgutan nga lalawigan.
Gisubay na sab karon kung pila ang natalang damyos sa agrikultura ug imprastraktura.
