DAVAO CITY – Gisubay pa karon sa otoridad kung unsa ang hinungdan sa nahitabong sunog sa mga panimalay kagabie sa Barangay Calinan ning dakbayan sa Davao.
Kahinumduman nga gilayong miresponde sa lugar ang mga sakop sa BDRRMC-Mintal Fire Unit ug EMS Unit human nga nakadawat ug report nga anaa ubay-ubay ka mga pinuy-anan ang gilamoy ug kalayo kilid sa Dr. Lorenzo Principe Clinic and Drugstore, sa Calinan Proper pasado alas siete kagabie.
Hinuon walay natala nga casualty sa maong insidente apan pipila sa mga residente ang walay nasalbar nga mga gamit sanglit paspas ang pagkatag sa kalayo diin kadaghanan sa mga panimalay ang gama lamang sa light materials .
Ginasuta na sab sa otoridad ang kinatibuk-ang damyos sa sunog.
Dungan sa pagsaulog sa fire prevention kanunay ang pahimangno sa otoridad nga kanunay mag-igmat ug subayon pag-ayo ang mga linya sa kuryente ug mga doble amping sa mga butang nga sagad hinungdan sa pag-ulbo sa kalayo.
Gi-andam na sab karon sa lokal nga kagamhanan ang ihatag nga hinabang alang sa mga nabiktima.
