DAVAO CITY – Gikumpirma sa Department of the Interior and Local Government (DILG)-Davao nga adunay pipila ka mga opisyal sa Davao Region ang nag-atubang ug kaso tungod sa anomalya sa pagpanghatag ug hinabang ilalom sa Social Amelioration Program (SAP).
Sumala pa kang DILG-Davao Director Alex Roldan nga pipila sa mga opisyal ang naggikan sa nagkadaiyang probinsiya sa rehiyon kalakip na sa Davao City tungod sumala pa sa iregularidad sa sa payout sa emergency cash subsidy atol sa first tranche.
Hinuon wala na gihinganlan pa sa opisyal ang mga siyudad, munipalidad ug barangay sa Davao region nga nalambigit sa nahisgutan nga mga anomalya.
Nasayran sa opisyal nga sa tibuok nasud, adunay 397 barangay ug local government officials ang nag-atubang ug susama nga criminal charges tungod sa anomalya samtang 700 ang kasamtangan nga giimbestigahan.
Gitataw sab nI Roldan nga mas gipahugtan pa karon sa Criminal Investigation and Detection Group (CIDG) ang ilang case build-up batok sa mga opisyal aron masubay kung adunay lig-on nga ebidensiya sa reklamo batok kanila.
Una na sab nga gibutyag sa opisyal nga kaniadtong bulan sa Mayo, adunay upat ka mga Mayor sa Davao region ang na-isyuhan ug show-cause orders gumikan sa gikanayong “poor performance” sa pagpanghatag niini ug emergency cash subsidy ilalom sa SAP sa ilang lokalidad.
