DAVAO CITY – Daghanang mga pamilya sa Digos City ang mibakwit human nga nakasinate ug kusog nga pagbaha ang pipila ka mga lugar sa nahisgutan nga siyudad human ang kusog nga pagbundak sa ulan.
Sumala sa opisyal nga si Samuel J. Miralles Local Disaster Risk Reduction Management Officer (LDRRMO) IV, gilayon nila nga gipalihok ang ilang mga sakop aron nga ibalhin sa mga evacuation Center ang mga residente nga nanimuyo sa low lying areas sa lugar aron nga dili mabutang sa risgo ang ilang kinabuhi human nga milampas na sa marker sa Canyos Bridge ang pagsaka sa tubig baha.
Sa kasamtangan anaa sa 198 ka mga pamilya ang gipahimutang sa City Gym sa Digos samtang 30 ka mga pamilya sab ang anaa sa National High School sa Davao del Sur.
Dali sab nga gihatagan ug pagkaon ug uban pang panginahanglanon ang mga apektadong residente sanglit kadaghanan sa ilang mga panimalay nga anaa daplin sa kasapaan ang gisulod ug tubig baha.
Hinuon wala pay natalang casualty ang CDDRMO Digos gumikan kay ila gilayon nga gipahimangnoan ang mga residente sa pagbakwit ayha misaka ang tubig baha sa lugar.
