DAVAO CITY – Gilauman sa COMELEC Davao de Oro nga mas mudaghan pa ang ihap sa mga botante sa probinsya, karong gilugwayan na ang voter’s registration.
Sumala sa Provincial Director niini nga si Atty. Krisna Samantha Caballero, managhan pa ang mga magparehistro isip botante sanglit Presidential elections na sunod tuig, ug daghang mas interesado nga muboto sa maong piniliay kung itandi sa midterm elections.
Subay sa ilang ulahing datos, anaa na sa dul-an 500 thousand ang registered voters sa nasangpit nga probinsya, mas taas kini kung itandi sa 462,942 nga ihap sa mga rehistradong botante sa probinsya niadtong 2019 midterm elections.
Sukad usab sa pagbalik sa voter’s registration usab sa bulan sa Hulyo, 29,297 ka mga registration, reactivation, correction of entry, ug transfers ang ilang nadawat.
Andam na usab ang COMELEC Davao de Oro sa pagdagsang og balik sa mga tawo nga buot magparehistro sa pagbalik sa voter’s registration karong Oktubre 11.
