DAVAO CITY – Pasirad-an sa City Transport and Traffic Management Office (CTTMO) ang pipila ka mga kadalanan sa downtown area alang sa mga ipahigayon nga aktibidad isip kabahin sa kasaulogan sa ‘Araw ng Dabaw’ karung Marso 16.
Una ng gitugtan sa city council sa milabay nga semana ang lokal nga panggamhanan nga pasirad-an ang pipila ka mga kadalanan aron nga mapahigayon ang mga events ug makunhuran ang paghuot sa dagan sa trapiko.
Kalakip sa mga aktibidad ang ang tulo ka oras nga Women’s Day Parade karung adlawa, Marso 8. Gikanayong magsugod ang parada sa Roxas Avenue ug molatas kini sa Ponciano, Bonifacio, Bolton, San Pedro, Legaspi ug matapos sa People’s Park.
Pasirad-an sab ang Rizal Park ug San Pedro Square sa Marso 10 hangtud 12 alang sa ‘Pasundayag’ cultural night.
Samtang gikan sa Marso 11 hangtud 15, did-an sab sa lokal nga panggamhanan ang pag-parking sa Davao City Recreation Center (kanhi Almendras Gym) alang sa ipahigayon nga Mutya ng Dabaw.
Sa Marso 16 pasirad-an ang convergence areas sa Roxas Avenue, CM Recto, Bonifacio, Pelayo, Legaspi, San Pedro streets alang sa socio-civic parade sa 80th Araw ng Dabaw samtang sa Marso 17-18, sirad-an usab ang mga kadalanan palibut sa Rizal Park ug San Pedro square alang sa ‘80s Street Party ug sa uban pang aktibidad.
