Nakasinati karon ug mga pagbaha ang pipila ka mga kabalayan sa Brgy. Doña Andrea, Asuncion, Davao del Norte tungod sa pag-awas sa sapa atol sa nasinating kusog nga pag-ulan karong buntaga.
Tungod niini, apektado karon ang mga residente sa nasampit nga dapit gumikan sa taas nga lebel sa baha.
Nasayran nga tibuok gabii nakasinati og pagbundak sa ulan ang nasampit nga lugar tungod sa sagunson nga pag-ulan nga epekto sa Shearline.
Nagpahigayon usab ang LDRRMO Castillo og briefing sa mga personnel sa AFP 60IB isip augmentation team alang sa epekto sa shearline sa munisipalidad sa Asuncion.
Una na usab nga nagpatuman ang maong lungsod og suspensyon sa klase sa tanang lebel sa pampubliko ug mga pribadong eskwelahan.
Sa karon anaa pa gihapon sa unang alerto kon (MONITORING PHASE) ang lebel sa tubig sa SAUG DAM – sa Brgy. Sahayen.
