DAVAO CITY – Nakitaan og danyos o buak sa pipila ka mga panimalay sa Barangay Paloc, Maragusan Davao De Oro karong buntaga Marso 6, human gitay-og sa linog ang probinsya sa Davao de oro kagainang ala-una sa kadlawon kon diin nakatala ang PhilVocs ug magnitude 5.2 nga linog bandang 4:43 kagainang buntag.
Gumikan niini, personal nga mibisita si Mayor Angelito “Lito” K. Cabalquinto aron mupahigayon og inspeksyon sa lungsod, ingon man lantawon ang status sa Davao De Oro Provincial Hospital- Maragusan kon unsa ang status sa maong gambalay ug sa mga pasyente niini.
Base sa record sa PhilVocs, nahimutang ang sentro sa linog sa New Bataan sa Davao De Oro, hain hangtud karon nakasinati og hinay nga mga aftershocks. Kalabot niini, gilayon mipagawas og direktiba si Davao De Oro Gov. Dorothy Gonzaga alang sa suspensyon sa mga klase karong adlawa sa tanang lebel sa pampubliko ug pribadong tulonghaan sa tibuok probinsya sa Davao De Oro. Nagpadayon usab ang monitoring sa mga LGUs sa tagsa-tagsa nila nga area of responsibility.
