DAVAO CITY – Nanawagan ang usa ka Pinoy nga nakabase karon sa California, USA nga dili lamang malisang inay mag-amping, mag-ampo ug motamud sa mamahimong kamandoan sa gobyerno.
Sumala pa kang Nef Barcelona, usa ka food industry worker nga nakabase sa California mas maayong magpabilin lamang sulod sa tagsa-tagsa ka mga panimalay kini aron nga malikayan nga makakuha ug virus.
Gikumpirma sab sa nahisgutan nga ubay-ubay na ka mga business establishment sa California, USA ang nanirado gumikan sa coronavirus disease kun COVID-19 nga mikayanap na sab sa Amerika.
Sumala ni Nef padayon gihapon sa ilang trabaho karon taliwala sa hulga sa COVID-19 gumikan gikinahanglan sumala pa og maayo ang suplay sa pagkaon sa mga katawhan ilang lugar.
Gibutyag usab niini nga nagka-ubos na ang mga suplay sa pipila ka mga pagkaon ug mga cleaning supply sa panimalay sama mga sa tissue paper kung diin talagsaon nalang kining makit-an sa mga groceries ug mga merkado.
Gilimitahan na usab ang mga kunsumante sa mga gipamalit niini nga mga panaliton aron malikayan ang pagtago niini ug panic buying sa publiko.
Samtang hugtanon sab sumala pa ang gipatuman ang community quarantine sa Amerika kung diin kadto lamang makagawas sa tagsa-tagsa ka mga panimalay ang dunay mga trabaho ug mopalit og mga pagkaon.
Pipila na sab ka mga estado ang mipailalom og lockdown kung diin mahisama na sumala karon sa ghost town ang California kung asa mingaw na ang kadalanan ug gikinahanglan anaa lamang sa mga panimalay ang mga residente.
Gibawalan na usab ang mga panagtapok diin gilimitahan lamang nga muadto sa usa ka balay sa napulo ka tao ingon man gidid-an na sab sila nga moadto og mga simbahan aron mosimba.
Dili sumala pa supak ang mga residente sa California sa mga kamanduan ug mga lakang nga gipatuman sa ilang gobyerno gumikan sa kahadlok sa COVID-19.
