DAVAO CITY – Dili interesante ang pipila ka mga grupo sa drayber sa Davao City sa ipahigayong usa ka simana nga transport strike sugod karong Marso 6.
Sumala pa ni Maning Duran, presidente sa Southeastern Mindanao Diversified Operators Cooperative kon SEMDOC, dagkong kawalan matud pa sa mga drayber ang pagkawala sa ilang kitaan ug dili sab makatabang sa ubang myembro sa kooperatiba ug ilang pamilya ang maong lakang agig protesta sa pagpapapha sa mga tradisyonal nga jeepneys ug modernisasyon sa natad sa pampublikong transportasyon sa nasud.
Wala sab miuyon ang maong grupo sa gilaraw nga High Priority Bus System sa Davao City LGU. Adunay pipila ka mga myembro ang mihunong na sa pagpamasada ug nangita na lamang og laing panginabuhian gumikan sa kamahal sa presyo sa lana ug uban pang palaliton.
Kahinumdumang sa unang pakighinabi kang Duran sa Bombo Radyo Davao, iyang gikanayon nga adunay mafia nga nagpaluyo sa PUV modernization program diin daw dali lamang kining nadesisyonan ug daw mas paborable kini sa mga dagkong negosyante.
Dugang pa ni Duran nga sagad sa mga nahisgutang mga kapitalista ang mga langyaw nga nakapabor sa mga kabtangan nga gipanag-iyahan sa Pilipinas aron mulambo ang ilang mga negosyo nga unang gipamahayag ni Senator Joel Villanueva.
Sa pikas bahin, walay nadawat nga report gikan sa ubang transport groups ang LTFRB Davao Region alang sa pagahimoong transport strike.
