DAVAO CITY – Subling mag operate ang pipila ka mga beach resort sa Island Garden City of Samal sugod karong adlawa. Kini human gi-aprubahan ang gipadangat nga hangyo sa lokal nga kagamhanan sa IGACOS ngadto sa Inter Agency Task Force (IATF) nga kung mamahimo nga tugtan ang pipila ka mga beach resort sa Isla nga mag operate gumikan aron mubalik ang panginabuhian sa tawo sa nasampit nga lugar.
Kahinumdoman nga sugod kaniadtong Desyembre 18, 2020 gipailalom sa General Community Quarantine (GCQ) ang IGACOS diin gipahunong sab ang leisure activities ingon man nagpatuman sab og liquor ban ug curfew nga milungtad kagahapong adlawa, Pebrero 28.
Apan, karong adlawa magsugod na ang pagpatuman sa Modified General Community Quarantine (MGCQ) sa Isla. Gawas sa pagpangabri sa pipila ka leisure activities, tangtangon na sab ang pagpatuman sa Liquor ban ug Curfew sa nasampit nga syudad.
Gipaniguro ni IGACOS Mayor Al David Uy nga padayon gihapon nga tumanon ang health protocols batok Covid-19 sa Isla bisan paman nga anaa na sa MGCQ ang status sa syudad.
Diin mao sab kini ang usa sa kondisyon sa IATF nga tugutan kini mag operate apan kinahanglan nga padayon nga mutamod sa health protocols ingon man pag limita sa pagdawat og mga guests sa beach resort aron malikayan ang pagkuyanap sa Covid-19.
Mihangyo sab si Mayor Uy sa katawhan nga bu-ot musulod sa Samal nga ipadayon ang pag obserba ingon man pagtamod sa health protocols batok Covid-19.
