Nakasinati og mga pagbaha ang pipila ka dapit ning dakbayan tungod sa way undang nga pagbunok sa ulan, kagabii.
Ang maong mga pag-ulan ug panalugdog ang kabahin sa epekto sa Southwest Moonson.
Gumikan niini, daghanang mga motorista na sab ang nangatanggong sa kadalanan hilabi pa nga sayo natigayon ang pagbunok sa ulan. Pipila sa mga lugar nga gipangbaha mao ang sa may Bago Aplaya, Toril, Calinan, Panacan, ug uban pa.
Sa post sa usa ka residente sa Baliok Talomo, daw nahimong falls ang dalan sa maong subdivision gumikan sa kakusog sa bul-og sa tubig-baha.
Samtang dungan sa naghuguros nga tubig-baha mao sab ang kusog nga pagpangilat rason nga daghanang residente ang nahimong igmat kagabii.
Sa pikas bahin, gisaway sa pipila ka driver ning syudad ang mga kadalanan nga gipang-ayo sa DPWH karong panahona.
Sumala pa sa usa ka driver nga nakatampo usab ang mga guba nga kadalanan sa bug-at nga dagan sa trapiko atol sa pag-ulan.
Sugyot pa niini sa maong ahensya nga mas maayong ayuhon na lamang nila ang mga kalsada panahon sa ting-init aron dili makadugang og kahasol sa mga driver ug pasahero.
