Nibaha ang pipila ka dapit sa J. P. Laurel Avenue, Davao City kagabii, tungod sa kusog nga bundak sa ulan nga adunay dungan nga kusog nga hangin.
Makita sa mga hulagway nga nakuha miabot sa tuhod ang kalawom sa baha human sa kusog nga ulan pasado alas 9:00 sa kagabii.
Sumala sa Davao City Disaster Risk Reduction and Management Office (CDRRMO), ang kusog nga ulan resulta sa localized thunderstorm. Nakasinati og light to moderate ug heavy rain nga adunay dalang pagdalugdog og kilat ang mga lugar sa Toril, Calinan, Tugbok, Talomo, Poblacion, Agdao, ug Buhangin Districts.
Samtang light rains ang naobserbahan sa ubang bahin sa Baguio, Marilog, Bunawan, ug Paquibato Districts.
Samtang miresulta usab sa power interruption kun brownout ang natumba nga punuan sa kahoy sa linya sa kuryente sa may Catalunan Grande, ning dakbayan sa Davao psado alas-8:00 kagabii tungod sa kusog nga ulan nga adunay dala nga kusog nga hangin.
Pipila sa mga apektadong lugar mao ang Lingap-Manambulan Road to Catalunan Grande Road (Elenita heights).
