DAVAO CITY – Suliran sa iyang trabaho ug depresyon ang pipila lamang sa mga rason sa pagpakamatay sa usa ka Pinoy nga taga dakbayan sa Davao nga usa ka magtutudlo sa Thailand.
Kahinumduman nga naghikog ang biktima nga si Melvin Cacho, 27 anyos, residente sa dakbayan sa Davao ug usa ka magtutudlo sa nasod Thailand.
Gihimo sa nahisgutan ang pagkutlo sa iyang kinabuhi sa balkonahe sa apartment niini sa Nonthaburi area sa nahisgutan nga nasod.
Gigamit sa nahisgutan ang power cord diin iya kining gihigot sa liog samtang ang pikas tumoy niini gihigot sa air compressor.
Nasayran nga nagtudlo ang nahisgutan sa government school ilalom sa Chulalongkorn University Nonthaburi project.
Sa iyang gibilin nga suicide note mihangyo kini nga ihatud lamang ang iyang bagahe pauli dinhi sa Pilipinas aron aduna sumala pay pasalubong ang iyang inahan.
Gitataw sab niini nga tungod sumala pa sa Covid, nawad-an siya ug trabaho.
Mihangyo sab kini sa iyang mga kaubanan sa trabaho ingon man sa mga pinoy nga anaa sa Thailand nga tawagan ang iyang pamilya dinhi sa Pilipinas.
Gibutyag sab sa biktima nga tanan niya nga sakripisyo ang alang sa ilang pamilya.
Mihangyo sab kini sa gobyerno sa Pilipinas ilabi na kang Pangulong Rodrigo Duterte nga tabangan ang iyang pamilya nga anaa dinhi sa dakbayan.
Nakansela sumala pa iyang flight hinungdan nga wala na kini nakauli sa Pilipinas gumikan sa Covid.
Hangtud karon, dili pa sab madawat sa iyang pamilya ang gidangatan ni Melvin nga giila nilang usa ka maayo nga igsuon ug anak.
