DAVAO CITY – Gituohan sa Filipina nga si Marites Panelo Cartujano-Martinez, 36 nga namenyo ug nanimuyo na sa Mexico City nga manganak na siya sa karsada human nga miigo ang 8.2 nga magnitude sa linog kagahapon.
Sumala pa niya nga sobrang nerbyos ang iyang gibati ug napugos sa paggula sa ilang balay sa kalisang nga mahugno kini.
Sa pagdagan pagula sa balay, dala niya ang usa ka tuig ug siyam ka bulan niya nga panganay nga anak nga lalaki nga si Matthew nga mag-birthday sa December 27.
Karong Septembre 27 sab ang paabot niya nga manganak sa ilang ikaduhang liwat nga nganlan nila ug Xavrina.
Bank Analyst sa Banko de Mexico ang iyang bana nga si Xavier Martinez Rodriguez, 42.
Sumala pa kang Marites pinaka-unang higayon niya nga makasenati ug susama ka kusog nga linog sukad nga mi-abot sa Mexico niadtong 2014 ug first time sab niya nga ma-interview sa radyo (Bombo Radyo Davao).
Ang mga ginikanan ni Marites anaa sa Roxas City, Capiz.
Wala pa’y nakompirma nga Pinoy nga namatay o kaha naangol sa nahisgutan nga linog nga nakakalas na ug halos 60 ka mga kinabuhi.
