Mitaliwan na ang usa ka Pinay caregiver nga giilang si Leah Mosquera, 49-anyos, taga Negros Occidental tungod sa mga samad nga naangkon sa dihang naigo sa Iranian missile ang iyang apartment sa Rehovot, Israel.
Matod pa sa Philippine Embassy sa Israel, si Leah gipaubos og daghang operasyon sa Shamir Medical Center sa intensive care unit sa ospital sa miaging mga semana.
Gikumpirmar ang iyang kamatayon sa iyang igsoon nga si Joy, nga nagtrabaho usab sa Israel.
Sumala sa embahada, giproseso na ang mga kahikayan alang sa pagpauli ug uban pang kinahanglanon nga tabang alang kang Mosquera.
Kahinumduman nga ang maong insidente kabahin sa nagkagrabeng tensyon tali sa Israel ug Iran, sukad nagsugod ang Israel og airstrike batok sa Iran niadtong Hunyo 13.
