Gibutyag sa City Transport and Traffic Management Office (CTTMO) nga ipatuman na ang paggamit og wheel clamp batok sa mga iligal nga nagaparking nga sakyanan sa Davao City, subay sa gihisgutan sa Sangguniang Panglungsod session niadtong Martes, Oktubre 14, 2025.
Sumala ni Atty. Eduardo Perez, Acting Head sa CTTMO, magpahigayon sila og pilot implementation sa mga lugar nga Daang Maharlika Highway, Sandawa Quimpo Boulevard, ug Tulip Drive.
Base sa giendorso nga ordinansa sa unang pagbasa sa City Council, ang mga dagkong sakyanan nga makasupak sa parking rules mamultahan og P5,000 clamping fee, samtang P2,000 ang multa alang sa gagmay’ng sakyanan.
Aron masiguro ang klarong patakaran, magbutang ang CTTMO og clamping zone signs sa mga natudlong dalan.
Tuyo sa maong lakang nga mapauswag ang kahapsay sa trapiko ug malimitahan ang illegal parking violations sa siyudad.
