Gipamatud-an pag-usab sa gobyerno sa Pilipinas nga ang posisyon kabahin sa West Philippine Sea nagpabiling lig-on, klaro, ug dili malalis, ug nakabase sa internasyonal nga balaod.
Gibutyag ni National Security Council Adviser Eduardo Año nga ang katungod sa nasud sa mga importanteng kadagatan lakip na ang Bajo de Masinloc ug ang Kalayaan Island Group klarong sakop sa exclusive economic zone (EEZ) sa Pilipinas ug giila sa usa ka internasyonal nga arbitral tribunal.
“Ang internasyonal nga balaod maoy naghatag og patas nga baruganan sa tanang nasud,” matod ni Secretary Año, nga midugang nga kini nagpasalig nga ang gagmayng nasud sama sa Pilipinas adunay susama nga tingog ug proteksyon sama sa mas kusgan nga mga nasud.
Dugang pa niya, ang nasud padayon nga nagtuman sa desisyon sa arbitral tribunal dili isip pagpanghagit, kondili isip paagi sa pagpreserba sa kahusay, kalinaw, ug hustisya tali sa mga nasud, ug aron masiguro nga ang tanang coastal states, bisan unsa pa ang kadak-on, motahod sa ilang mga katungod ug motuman sa ilang mga responsibilidad ubos sa internasyonal nga balaod.
