DAVAO CITY – Nagbangga ang usa ka pick-up truck, 10-wheeler truck, ug lain pang Reefer truck sa Barangay Coronon, Santa Cruz, Davao del Sure kagabii.
Sumala sa mga nakakita sa nasangpit nga insidente, nihunong ang pick-up gumikan kalit na lamang nga milahos ang 10-wheeler truck.
Apan, naigo kini sa reefer truck, maong nalusot ang pick-up sa likod nga bahin sa 10-wheeler truck.
Sa kakusog sa impact, nalumping ang pick-up truck, hinungdan nga naipit ang duha ka sakay sa nasangpit nga sakyanan.
Gilayong gitabang ang driver sa pick-up ug ang kauban niini sa mga sakop sa Santa Cruz Municipal Risk Reduction and Management Office aron dal-on sa pinakaduol nga balay tambalanan.
Gawas sa duha nga nanga-angol, wala nay laing nadamay pa sa insidente.
Hinuon, anaa na sa luwas nga kahimtang karon ang duha ka sakay sa pick-up truck.
