DAVAO CITY – Gipanghimakak sa Philippine Institute of Volcanology and Seismology (Phivolcs) nga bakak ug wala’y igo nga basihan ang gipakatag nga pahimangno sa social media nga usa ka magnitude 7 nga mo-igo sa dakbayan sa Davao.
Gipanghimakak sab sa Phivolcs, pinaagi kang Phivolcs Science Research Specialist Janila Deocampo nga sila ang tinubdan sa nahisgutan nga impormasyon kalabot sa dakung linog nga mo-igo karong Pebrero 24 ug Marso 8.
Subling gipahayag sa ahenswya nga hangtud karon dili lamang gihapon matagna kung asa ug kanus-a moigo ang usa ka linog.
Wala pa gihapo’y kasaligan nga teknolohiya nga magamit alang niini.
Subay niini gipahimangno-an nila ang public nga likayan na lamang ang pag-share sa bakak nga mga impormasyon.
Gidasig hinoon nila ang katawhan nga mosusi sa Phivolcs website lakip na ang ilang Facebook ug Twitter pages alang sa dugang kasayuran kalabot sa mga linog ug ang mga giya alang sa kaluwasan panahon nga mahitabo ang linog.
