Gihagit sa Philippine Bar Association ang Senado nga magmatinud-anon ug tukmang buhaton ang ilang katungdanan kalabot sa impeachment batok ni Bise Presidente Sara Duterte.Kini ang ilang panawagan ngadto sa mga kasamtangang senador human ilang ipagawas ang opisyal nga pamahayag kabahin sa isyu sa pagpahawa sa ikaduhang pangulo sa nasud.
Matod sa maong grupo, klaro kaayo nga nakalatid sa Konstitusyon sa Pilipinas nga kinahanglan ipadayon ang impeachment trial sa Senado.
Bisan pa man nga posible nga adunay mga senador nga dili mouyon nga buhaton kini gilayon, gikanayon sa grupo nga dili kini angay nga mahimong hinungdan aron madugay og pila ka buwan ang proseso.
Gipanguhanag pa niini nga ang prinsipyo nga “majority wins” dili lisensya aron buhaton kining basehan sa pagpili kung gikinahanglan bang buhaton ang usa ka katungdanan nga gimando na sa konstitusyon.
Gidugang pa nga “mandatory” o obligado ang paghimo og trial sa higayon nga maduso o mapasar na sa Kamara de Representantes ang Articles of Impeachment. Wala’y bisan unsang ahensiya o sanga sa gobyerno – lakip na ang Senado – ang makalikay sa ilang responsibilidad. T
ungod niini, ilang giinsistir nga ang trial dapat ipadayon base sa gibutyag, nakalatid, ug gisugo sa konstitusyon.
Kini usab, matod pa nila, aron mapresentar sa prosekusyon ang ilang kaso ug matagaan og kahigayonan ang akusado nga mapasabot ug mapanalipdan ang iyang kaugalingon batok sa mga alegasyon nga gipasangil batok kaniya.
