DAVAO CITY – Takus nga gidawat sa PhilHealth Davao ang pagpahunong ni Pangulong Bongbong Marcos sa pagpasaka sa premium rate alang karong tuig 2023.
Gikanayon ni PhilHealth 11 division chief field operations Filbert Sollesta, gidawat sa buhatan ang kamanduan ni PBBM aron maalibyohan ang mga myembro sa pagsaka sa mga presyo sa mga palaliton gumikan sa inflation. Nagpasabot kini nga anaa gihapon sa 4% ang premium rate sa mga empleyado nga dunay ubos sa P80,000 nga income.
Gikabutyag sa opisyal nga kon ugaling madayon kini, magpataas sab ang buhatan sa ilang mga serbisyo subay na sab sa Universal Health Care Law nga gilaumang magpasaka ug premium rate sa PhilHealth hangtud 5% pagtungtung sa tuig 2025.
Sa pagkakaron, mamahimo gihapong pahimuslan sa mga myembro niini ang Konsulta program, nga nagtanyag og ubos nga presyo sa pagpakonsulta sa mga accredited hospitals dinhi sa rehiyon.
Kahinumdumang gipasuspinde ni PBBM ang hike sa premium rates ngadto sa 4.5% niadtong Enero 4 tungod sab sa hangyo sa publiko ngadto sa gobyerno nga dili madungagan ang ilang mga bayrunon gumikan sab sa nagpadayong epekto sa inflation.
via || Bombo LJF
