Opisyal ng gipresenta sa Pilipinas sa United Nations (UN) ang claim niini alang sa Extended Continental Shelf (ECS) sa Kasadpang Dagat sa Pilipinas isip kabahin sa pagpalig-on sa sovereign rights sa nasud ubos sa internasyonal nga balaod.
Gipangunahan ni Philippine Permanent Representative to the United Nations nga si Ambassador Enrique Manalo ang delegasyon sa atubangan sa UN Commission on the Limits of the Continental Shelf sa New York aron ipresentar ang maong claim. Sumala pa sa Department of Foreign Affairs (DFA), gisumite sa Pilipinas ang maong aplikasyon subay sa Article 76 sa United Nations Convention on the Law of the Sea (UNCLOS) aron matino ang gawasnong utlanan sa continental shelf sa Pilipinas.
Dugang pa niini, ang giangkon nga lugar naglangkob sa salog sa dagat ug ilawom niini nga molapas sa 200 ka nautical miles ug mahimong moabot hangtod sa 350 ka nautical miles gikan sa baseline sa Pilipinas.Gipasabot usab sa DFA nga ang maong pagsumite kabahin sa paningkamot sa gobyerno aron mapanalipdan ang katungod sa Pilipinas sa kadagatan, mapalig-on ang panginabuhian sa mga Pilipino, mapauswag ang patigayon, mapanalipdan ang marine biodiversity, ug mapatuman ang rule of law sa kadagatan.
Lakip sa gihangyo sa Pilipinas ang pagkonsiderar sa mga may kalabotang desisyon sa mga international tribunal, lakip na ang 2016 Arbitral Award, nga naglatid sa maritime entitlements sa mga nasud nga adunay pag-angkon sa mga gilalisang katubigan. Kahinumduman nga ikaduha na kini nga higayon nga nagsumite ang Pilipinas og claim alang sa Extended Continental Shelf, sunod sa Philippine Rise o Benham Rise, nga giaprubahan sa komisyon niadtong 2012.
